1.
<V.> Ad terrorem omnium
surgam locuturus.

Meus sermo percutit
velud ensis durus.

Nichil est quod timeam
valde sum securus.

Omnis clerus audiat
simplex et maturus.

2.
V. Puniendi clerici
sunt et cardinales

abbates prepositi
nigre moniales

sacerdotes emuli
clerici venales

comparantes iugiter
opes temporales.

3.
V. Quid est avaricia
nisi vilis cultus

vanitatum vanitas
cordium tumultus.

Pereunt divicie
perit homo stultus

quando dives moritur
statim fit sepultus.

4.
V. In sepulchro tegitur
vili tegumento

et postea punitur
misero tormento.

In tormento quatitur
ut arundo vento

redimi non prevalet
auro nec argento.

5.
V. Cogitate clerici
qui vel quales estis

nunquid de iudicio 
dicere potestis.

Legite psalmigraphum
et invenietis

unum  vobis nunccio
quod percipietis.

6.
V. Iudicabit iudices
iudex generalis

ibi nulli proderit
dignitas papalis

sed fetorem senciet
pene gehennalis

sive sit episcopus
sive cardinalis.