1.
<V.> Ihesus Christus nostra salus
quod reclamat omnis malus
nobis sui memoriam
dedit in panis hostiam.

V. O quam sanctus panis iste
tu solus es Ihesu Christe
panis cibus sacramentum
quo nunquam maius inventum.

R° Eya iubilate
vocem attollite
nostro creatori
symphoniis ympnidicis
Christum zelate.

2.
V. Hoc donum suavitatis
caritasque deitatis
virtus et eukaristia
comunionis gracia.

V. Ave deitatis forma
dei unionis norma
in te quisque delectatur
qui te fide speculatur.

R° ut supra Eya...

3.
V. Non es panis sed es deus
homo liberatur reus
qui in cruce pependisti
et in carne defecisti.

V. Non augetur consecratus
nec consumptus fit mutatus
nec divisus in fractura
plenus deus in statura.

R° ut supra Eya...

4.
V. Esca digna angelorum
pietatis lux sanctorum
lex moderna conprobavit
quod antiqua figuravit.

V. Salutare medicamen
peccatorum relevamen
pasce nos a malis leva
duc post ubi est lux ewa.

R° ut supra Eya...

5.
V. Ach quam magna tu fecisti
dum te Christe impresisti
panis et vini specie
effancium in facie.

V. Caro cibet [cibus] sangwis vinum
est misterium divinum
huic sit laus et gloria
in seculorum secula.

R° ut supra Eya iubilate...