1.
Verbum bonum et suave
personemus illud ave
per quod Christi fit conclave
virgo mater filia.
2.
Per quod ave salutata
mox concepit fecundata
virgo David stirpe nata
inter spinas lilia.
3.
Ave veri Salomonis
mater vellus Gedeonis
cuius magi tribus donis
laudant puerperium.
4.
Ave solem genuisti
ave prolem protulisti
mundo lapso contulisti
vitam et imperium.
5.
Ave sponsa verbi summi
maris portus signum dumi
aromatum virga fumi
angelorum domina.
6.
Supplicamus nos emenda
emendatos nos commenda
tuo nato ad habenda
sempiterna gaudia.
