Prosa
Mittit ad virginem
non quemuis angelum
sed fortitudinem
suam archangelum
amator hominis
Fortem expediat
pro nobis nunccium
nature faciat
ut preiudicio
in partu virginis
1.
Ave yerarchia
celestis et pia
dei monarchia
respice nos quia
ut erigamur
errantes in via
2.
Versus
Maria beata
doce nos mandata
nostre legis grata
nos servare rata
virgo nobilis
et intemerata
Naturam superat
natus rex glorie
regnat et imperat
et zima scorie
tollat de medio
Superbiencium
terat fastidia
colla sublimium
calcet vi propria
potens in prelio
3.
Sequitur versus
Gracia diuina
de superno syna
virginum regina
veniam propina
tu celerius
aurem huc inclina.
4.
Plena dulcorosa
dona fer annosa
nostre legis glosa
ne sis odiosa
te petentibus
mater graciosa.
Exi qui mitteris
hec dona discere
reuela ueteris
uelamen littere
virtute nunccii
Foras eiciat
mundanum principem
matremque faciat
secum participem
patris imperii.
5.
Dominus plasmauit
adam qui peccavit
que malum piauit
quando te vocauit
et in utero
beatifi<cavi>t.
6.
Tecum nunc redemit
mundum quem exemit
zabulon qui fremit
nobisque et emit
ut nos aleret
postea redemit.
Accede nuncia
dic ave cominus
dic plena gracia
dic tecum dominus
et dic ne timeas
Uirgo suscipias
dei depositum
in quo perficias
castum propositum
et uotum teneas.
7.
Benedicta sola
de superna scola
deitatis mola
nos a fece cola
nostri criminis
purgatrix et mola.
8.
Inter mulieres
tu sola adheres
deo uelud heres
ut manu teneres
primogenita
quibus nos impleres.
Audit et suscipit
puella nunccium
credit et concipit
et parit filium
sed admirabilem
Consiliarium
humani generis
et deum forcius
et patrem poteris
in fide stabilem.
9.
Benedicta digne
pneumatis in igne
verbum per insigne
quod tibi benigne
missus gabriel
tulit tam benigne.
10.
Ventris tui fructus
celitus con<du>ctus
per patrem instructus
et in mundum ductus
carnem sumere
postea reductus
Qui nobis tribuat
peccati ueniam
reatus diluat
et donet patriam
in arce syderum.
11.
Tuum per iuuamen
pater natus flamen
iudicis examen
nobis det solamen
ne nos terreat
sed salvet nos amen.
