1.
Salve amicta sole
sponsa claritatis
summi patris prole
fecunda pneumatis
prodis nobis in lucem
solem iusticie
mutans tu vetuste
Ewe tristiciam.

2.
Lunam sub tuis pedibus
calcans terrestria
pulcrior syderibus
celorum agmina
laudant te matrem luminis
tu porta principis
clausa eternaliter
nunc et perhenniter.

3.
Coronam gemmarum
gestans in capite
duodecim stellarum
miro tu ordine
profers virgo filium
ut sidus radium
rosa spinarum germine
producis lilium.

4.
Polum spargis aurora
candor originis
dulcis et decora
ad nos progrederis
styrps Yesse ex prophetica
tu Aaron virgula
frondens flores educens
nuces amigdala.

5.
O rutillans maris stella
portus refugii
ne mortis nos procella
demergat inferi
sucurre fluctuantibus
in mundi pellago
in te confidentibus
tuo sufragio.

6.
O celi porta fulgida
clavis Davidica
que verbo claudis apperis
regis pallacia
educ vinctos de carcere
tu mater venie
solve nos a tenebris
huius miserie.

7.
O Libanus non incisus
cipressus in Syon
te circumfluit riwus
paradisi Gion
riga nos virtutibus
repelle iurgia
tuis fruamur dotibus
da pacis federa.

8.
O turris fortitudinis
scutum auxilii
mille ex te clipei
dependent aurei
exstirpa cunctas hereses
tua potencia
ne nos labamur desides
tua clemencia.