1.
<V.> <D>ies est leticie
in ortu regali

<V.> nam processit hodie
de ventre virginali.

R° Puer admirabilis
totus delectabilis
in humanitate
qui inestimabilis
est et ineffabilis
in divinitate.

2.
<V.> Orto dei filio
virgine de pura

<V.> ut rosa de lilio
stupescit natura.

R° Quem parit iuvencula
natum ante secula
creatorem rerum
quod uber mundicie
dat lac pudicicie
antiquo dierum.

3.
V. Mater hec est filia
pater hic est natus

<V.> quis audivit talia
deus homo natus.

R° Servus est et dominus
qui ubique cominus
nescit comprehendi
presens est et eminus
stupor ille geminus
nequit comprehendi.

4.
V. In obscuris nascitur
illustrator solis

<V.> stabulo reponitur
princeps terre molis.

R° Fasciatur dextera
qui affixit sidera
dum celos ascendit
concrepet vagitibus
qui tonat in nubibus
dum fulgur ascendit.

5.
V. Angelus pastoribus
iuxta suum gregem

<V.> nocte vigilantibus
natum celi regem.

R° Nuncciat cum gaudio
iacentem in presepio
infantem pannosum
angelorum dominum
et pre natis omnium
forma speciosa.

6.
V. Ut vitrum non leditur
sole penetrante

<V.> sic illesa creditur
post partum et ante.

R° Felix es puerpera
cuius casta viscera
deum genuerunt
et beata ubera
in etate tenera
Christum lactaverunt.

7.
V. Orbis dum describitur
virgo pregnans ibat

<V.> Bethleem qui nascitur
puer qui nos scribat.

R° In illorum curia
qui canebant gloriam
nove dignitatis
deus in sublimibus
dat pacem hominibus
bone voluntatis.

8.
V. Christe qui nos propiis
manibus fecisti

<V.> et pro nobis omnibus
nasci voluisti.

R° Te devote poscimus
laxa quod peccavimus
ne sinas perire
post mortem nos miseros
ne simul ad infernos
paciaris ire.

Amen.