Audi tellus audi magni maris nymbus
audi omne quod vivit sub sole.

Huius mundi decus et gloria
quam sit falsa quam transitoria

ut testantur hoc temporalia
non in uno statu manencia.

Transsit enim rerum maneries
ut liquescit a sole glacies.

Nulli prodest regalis dignitas
nulum salvat corporis quantitas.

Nil arcium valet profunditas
nulli prodest habere divicias.

Nullum salvat genus aut species
nulli valet auri congeries.

Ubi Plato ubi Porphirius
ubi Tulius et Vergilius.

Ubi Catho aut Empedocles
ubi egregius Aristoteles.

Cum Helena Paris pulcherrimus
ubi Achilles vir magnanimus.

Allexander aut ubi Karolus
ubi Hector Troye fortissimus.

Ubi Sampson vir durissimus
ubi Absolon ubi Julius.

Transierunt per leges mortalium
per unius momenti spacium.

Pie deus rector fidelium
fac te nobis propicium

cum de malis fiet iudicium.