Huius mundi decus et gloria
quam sit falsa quam transitoria.
Contestantur hec temporalia
non in uno statu manencia.
Nichil enim regalis dignitas
nichil valet corporis quantitas.
Nil arcium valet profunditas
nichil valet carnis iocunditas.
Nullum salvat genus nec species
nulli prodest auri congeries.
Transit enim rerum materies
ut liquescit a sole glacies.
Ubi Plato ubi Pompeius
ubi Porus ubi Porfirius.
Ubi Cesar ubi Virgilius
ubi Darus aut ubi Darius.
Alexander rex ubi maximus
Hector Troum ubi fortissimus.
Cum Helena Paris pulcherrimus
aut Achilles ubi magnanimus.
Transierunt leges mortalium
per unius diei spacium.
Sed o deus rector fidelium
fac te nobis Christe propicium
cum de malis fiet iudicium.
