1.
<V.> Ave venerabilis
venustate moris

V. Virgo delectabilis
sine ve doloris.

R° Maria tu proprio
nomine vocaris
sonat vocis racio
quod es stella maris
quod es stella maris.

2.
V. Gracia te spiritus
sancti fecundavit.

V. Verbo quod divinitus
in carnem formavit.

R° Plena dei filium
verbo peperisti
nec pudoris lilium
partu dirupisti.

3.
V. Dominus signaculo
sponsam te signavit.

V. Quam sponsus in anulo
suo subarravit.

R° Tecum habes filium
formam deitatis
contrahis connubium
summe trinitatis.

4.
V. Benedicta domina
regina celorum.

V. Tibi laudes agmina
cantant angelorum.

R° Te in mulieribus
semper benedicta
gracior es omnibus
sanctiorque dicta.

5.
V. Et cum desideris
optabant prophete.

V. Per quem nobis miseris
inponuntur mete.

R° Benedictus omnium
machinas rex fecit
celi terre marium
quas tibi subiecit.

6.
V. Fructus ex te nascitur
cibus angelorum.

V. Pascit nec depascitur
esu comestorum.

R° Ventris in sacrario
deum concepisti
quam manes misterio
mundo expulisti.